Espainiako auzitegien inposizio antidemokratikoa dela-eta, egoera hain larria izanik, Udalbiltzak, Euskal Herriko nazio erakunde gisa, sufragio unibertsalerako eskubidearen aurkako zentsurari aurre egitera deitu nahi ditu Euskal Herriko alderdiak zein herritarrak, euskal herritarrek euren borondatea libreki adieraz dezaten eta bozkatzen dutena errespetatu egin dadin.

Udalbiltza oso kezkatuta dago Araban, Bizkaian, Gipuzkoan eta Nafarroa Garaian egingo diren foru eta udal hauteskundeen karietara jazo den eraso antidemokratikoa dela eta. Lau urte pasatu dira, baina, dagoen alderdia dagoela Espainiako gobernuan, sufragio unibertsalik gabeko hauteskundeak egin nahi dituzte berriro ere.

PPren gobernuak 249 zerrenda salatu zituen duela lau urte. Gaur, Espainiako gobernuaren ekimenez, Auzitegi Nagusiak eta Konstituzio Auzitegiak ia 400 zerrenda deuseztatu dituzte, eta Hego Euskal Herriko biztanleriaren %85en sufragio unibertsalerako eskubidea suntsitu.

Bost axola zaie euskal herritarrek hauteskunde demokratikoen aldeko borondate argia adierazi izana. Herritarren gehiengoak Alderdien Legearen aurkako jarrera adierazi du behin eta berriro, eta milaka herritarrek sinatu dute udaletan zein notariotzetan, aukera politiko guztiek baldintza berberetan aurkeztea izan dezaten. Aitzitik, herritar horiei guztiei iseka egin eta sorgin ehizan hasi dira berriro, milaka lagunen ideologia aztertzen. Inkisizio eta espioitza politikoa areagotu eta apartheidaren beste aro bati ekitea erabaki dute, prozesu politikoa suntsitu nahian. Izan ere, kaltetua ez da ezker abertzalea eta haren gizarte oinarria bakarrik, gatazka behin betiko konpon dezakeen prozesu demokratikoa eta Euskal Herria bera baizik.

Euskal herritarrek behin eta berriz esan dute gatazkaren zergatiak konponduko dituen prozesu politikoa eta udal hauteskunde demokratikoak nahi dituztela. Nor dira Madrilgo gobernua eta bere agindupean dauden fiskalak eta abokatuak hori guztia zapuzteko? Zergatik erabaki ahal dute Espainiako Auzitegi Nagusiak eta Konstituzio Auzitegiak zer euskal herritar aukez daitezkeen hauteskundeetara eta zein ez? Zergatik onartu behar ditugu euskal herritarrok hauteskunde hauen iruzurrezko emaitza ofizialak?

Udalbiltzak, euskal herritar orori dagozkion eskubide guztiak Euskal Herri osoan aitortu eta errespetatzeko konpromisoarekin bat, nazioarteko hainbat instantziak egin duten bezala, bere kezka larria adierazteaz gain, iruzurrezko jokabide horiek guztiak ozenki salatu nahi ditu. Bidenabar, Europan zein munduan eskubide zibilen eta politikoen alorrean aritzen diren erakundeak Euskal Herrian gertatzen ari dena arretaz begiratzera eta Espainiako erresumako gobernuari zein Europar Batasuneko lehendakaritzari euren iritzia jakinaraztera deitu nahi ditu.

Egoera hain larria izanik, Udalbiltzak, Euskal Herriko nazio erakunde gisa, Espainiaren inposizioen gainetik, euskal herritar gisa aritzera deitu nahi ditu Euskal Herriko alderdi politikoak zein herritarrak:
1. Espainiako auzitegien inposizio antidemokratikoaren gainetik, euskal herritarrek euren borondatea libreki adierazi behar dute, sufragio unibertsalerako eskubidearen zentsura aintzakotzat hartu gabe, Euskal Herri osoan eskubide guztiak aitortu eta bermatuko dituen esparru politikoa ahalbidetu behar duen prozesu demokratikoarekiko konpromisoa adierazi duten indar politikoei emanez botoa.
2.Herritarrek botoen bidez adierazten duten hautua errespetatzea demokraziaren oinarrizko zutabea izanik, indar politiko guztiek iruzurrik gabeko emaitza aintzakotzat hartzeko deia egin nahi dugu, oinarrizko printzipio demokratikoen agindua baita herritarrek euren botoen bidez hautatzen dituzten pertsonek soilik osa ditzaten udal zein foru erakundeak. Udalbiltzaren osaerari dagokionez, Euskal Herriko udal hautetsien izaera aitortzeko beharrezko prozedura indarrean jarriz, horixe egingo duela jakinarazi nahi du nazio erakundeak, euskal herritarren botoa Espainiako epaileen erabakiak baino zilegiago iruditzen baitzaigu.
3. Hauteskunde hauetatik sortuko diren hautetsi guztiei, Euskal Herriko eragile sozial askok eskatu dutenarekin bat, Udalbiltza berrindartu, berrantolatu eta hasiera bateko xedea lortzeko behar duen eragingarritasuna berreskuratzeko konpromisoa hartu eta bete dezaten eskatu nahi diegu, Euskalduna Jauregiko batzar eratzailean onartu ziren bost printzipioak errespetatuz.
4.Euskal herritar orori naziotasun eskubidearen inolako urratzerik onar ez dezaten eskatu nahi diegu, eta, ildo horretan, bozkatzeko, EHNA erabil dezaten norberaren burua aurkezteko; galarazten duten tokietan, hauteskunde mahaian bertan euren kexa adieraz dezaten; eta, nahi izanez gero, naziotasun eskubidearen urratzea salatzeko, Nazio Batuen Erakundeko Giza Eskubideetarako goi mandatariarentzako eskakizun ofiziala bete dezaten, maiatzaren 27an horretarako antolatuko diren guneetan.

Euskal Herrian, 2007ko maiatzaren 14an
UDALBILTZAko PRENTSA BULEGOA