Euskal Herriak herri gisa jarduteko eskubidea du, naziotasun eskubidea du. Urriak 12ko Hispanitate eguna dela eta, gure nazio izaera ukatzeko kutsu berezia duten data guzti hauetan, Euskal Herriaren eraikuntzan murgiltzeko eta euskal naziotasuna aldarrikatzeko deia luzatu nahi diogu euskal herritar orori.

Herri guztiek euren burua antolatzeko eskubidea dutela dio Argeleko Kartak. Bestetik, Inori ez zaio berea ez den naziotasuna inposatuko baieztatzen du Giza Eskubideen Aldarrikapen Unibertsalak. Inposaketaz beteriko errealitateak, aldiz, kontrakoa adierazten du eta horren lekukoa da biharko data esanguratsua. Banderen aferarekin egiten ari diren bezala, Urriaren 12a edo uztailaren 14 bezala, Espainiako zein Frantziako besteak beste estatuen festa nagusiak izanik, mehatxu eta inposaketa gisa bizi dira Euskal Herrian. Euskal Herrian pairatzen dugun menpekotasuna goraipatzeko baliatzen baitute bi estatuek.
Euskal Herriak, askatasunean, justizian, bakean eta berdintasun printzipioetan oinarritzen den nazioarteko harreman marko batean bizi nahi du. Bere eskubideen jabe den Nazio gisa bizi nahi du. Euskal herritarrek munduko edozein herrietako kideak bezala izan nahi dugu. Horregatik, bestak beste, gure festa egutegiaren arabera bizi nahi dugu, gure nazio sinboloak besteen parean ikusi nahi ditugu, gure nazio mailako kirol selekzioak nazioarteko txapelketa ofizialetan parte hartzen ikusi nahi ditugu, gure dominio informatiko propìoak erabili nahi ditugu, gure hezkuntza curriculuma osatu nahi dugu eta era orokorrean herritar gisa dagozkigun eskubide guztiak bermaturik izan nahi ditugu.
Hori guztia dela eta, Udalbiltzak, nazio instituzio gisa, gure nazio izaera ukatzeko kutsu berezia duten data hauek guztietan bereziki, Euskal Herriaren eraikuntzan murgiltzeko eta euskal naziotasuna aldarrikatzeko deia luzatu nahi dio euskal herritar orori.